د ترکیې ولسمشر رجب‎طیب اردوغان پر اروپايي ټولنې ټینګار کړی چې له دې ټولنې سره دې د ترکیې د یوځای کېدو په تړوا خبرې پیل کړي.

نوموړي خبرداری ورکړی چې که داسې ونه شي انقره به له دې ټولنې سره د خبرو اترو لپاره نور هېڅ ونه لري او خدای پاماني به ورسره وکړي.

اردوغان دا څرګندونې وروسته له هغې کوي چې د اروپايي ټولنې د پراختیا کمېشنر یوهانس‎هان د سې شنبې په ورځ وویل، د اردوغان تر واکمنۍ لاندې ترکیې له اروپايي ټولنې سره یوځای کېدو ته شا کړه.

اردوغان دا څرګندونې په انقره کې په هغو مراسمو کې کولې چې د عدالت او پراختیا د ګوند غړیتوب ته د ده د بیا ورستنېدو په اړه جوړ شوی وو.

رجب‎طیب اردوغان وویل:

"نور پرته له دې چې اروپايي ټولنې ته د ترکیې د شاملېدو په اړه د خبرو اترو فصل پرانیزئ، هغه څه چې تاسو تر اوسه نه دي پیل کړي، بل انتخاب نه شته، که اروپايي ټولنه دا فصل پرانیزي ډېره ښه ده. که نه نو د خدای پامان .. ترکیه د اروپايي ټولنې دروازه ساتونکې نه ده."

بل خوا د ترکیې د بهرنیو چارو وزیر مولود چاوش‎اوغلو د سې شنبې په ورځ اعلان وکړ چې اردوغان به په بروکسل کې د ناټو د مشرانو د هغې غونډې په څنګ کې له اروپايي مشرانو سره وګوري چې د مې په ۲۴ مه او ۲۵ مه نیټه جوړېږي.

د ایران د بهرنیو چارو وزیر نن پلازمینې مسکو ته ورسید. رویټرز اژانس څرګندوي چې تمه ده عباس عراقچي به د روسیې له ولسمشر ولادیمیر پوتین سره هم وګوري.

دا سفر په داسې وخت کې ترسره کیږي چې ټاکل شوې ده دوې ورځې وروسته د ایران او د امریکا د متحد ایالتونو استازي د ایران د اټومي مسالې په تړاو دوهم پړاو خبرې پيل کړي.

د دې خبرو لومړی پړاو د شنبې په ورځ د عمان په پلازمینې مسقط کې ترسره شو چې په دې خبرو کې د ایران د پلاوي مشري عباس عراقچي کوله او د متحد ایالتونو د پلاوي مشري د امریکا د منځني ختیځ په چارو کې مسوول ستیف ویټکوف کوله.

د لومړي پړاو تر خبرو مخکې ښاغلی ویتکوف روسیې ته تللی و او بیا له هغه ځایه عمان ته ولاړ.

تهران او واشنګتن ویلي دي چې د خبرو لومړی پړاو مثبت او رغنده و.

یوه الوتکه چې ۱۳۸ افغان کډوال پکې سپاره وو، له اسلام اباد څخه د جرمني لایپزیګ ښار ته ورسیده.

د جرمني د بهرنیو چارو وزارت ویاند وویل چې ټولو افغانانو د "مشروط قانوني استوګنې جوازونه" ترلاسه کړي دي.

د جرمني د کورنیو چارو وزارت ویلي چې په پناه غوښتونکو کې ۴۵ ماشومان، ۷۶ ښځې او ۶۲ نارینه شامل دي.

دوی به لومړی د مرکزي جرمني د کډوالو کمپ ته ولیږدول شي او په راتلونکو دوو اونیو کې به نورو ښارونو ته وویشل شي.

سږ کال درې نورو الوتکو ۴۶۱ افغان کډوال جرمني ته لیږدولي.

د جرمني د بهرنیو چارو وزارت وايي چې نږدې ۲۶۰۰ "زیان منونکي" افغانان لا هم جرمني ته د لېږد په تمه دي.

دا هغه افغانان دي چې وايي د طالبانو د واکمنۍ لاندې په افغانستان کې د دوی ژوند په خطر کې دی.

د جرمني د بهرنیو چارو وزارت ویاند د دې پوښتنې په ځواب کې چې زیانګالي افغانان به د پاکستان د حکومت لخوا د جبري ایستلو له خطر سره مخ نشي، وویل: "موږ د پاکستاني چارواکو سره نږدې همغږي لرو او ژمن یو چې د هغو کسانو سره مرسته وکړو چې د لیږد ژمنه یې شوې ده."

ارسنال او انټرمیلان د اروپا د فوټبال اتلانو جام نیمه پایلوبې ته لار پیدا کړه.

ارسنال چې تېره اوونۍ یې هم ریال مادرید ته درې – صفر ماته ورکړې وه بېګا بیا وتوانېد دوه – یو خپل سیال مات کړي.

په دې سره ارسنال سیمي فاینل ته لاړ.

په بله مهمه لوبه کې انټرمیلان ۲ – ۲ له بایرن مونیخ سره مساوي شوه خو د تېرې لوبې په خاطر چې ۲ پر ۱ يې لوبه ګټلې نیمه پایلوبې ته ووته.

په نیمه پایلوبه کې انټرمیلان له بارسلونا سره لوبه کوي.

د اروپا د اتلانو جام نیمه پایلوبې به دوه اوونۍ وروسته پیل شي.

د ایران قضایه قوې یو پېژندل شوی رپر سندرغاړی «تتلو» په اعدام محکوم کړی دی.

د قضایه قوې ویاند اصغر جهانګیر ویلي چې د امیرحسین مقصودلو د اعدام د حکم په وړاندې اعتراض شوی او دمګړۍ په ستره محکمه کې د څېړنې په حال کې دی.

امیرحسین مقصودلو چې په خپل هنري نوم «تتلو» شهرت لري د فساد او فحشا په تور په لس کاله بند او مقدساتو ته د سپکاوي په تور په پنځو کلونو بند محکوم دی.

د ایران قضایه قوې مقدساتو ته د سپکاوي په تور هغه ته د اعدام سزا اورولې ده.

امیرحسین مقصودلو چې کلونه په ترکیه کې اوسېده د ۱۴۰۲ کال په لیندۍ کې د ایران د کنسولګرۍ د شکایت پر بنسټ د پولیسو له خوا ونیول شو او ایران ته واستول شو.

امیرحسین مقصودلو په خواله رسنیو هم خورا شهرت لري. انستاګرام د هغه پاڼه چې څلور میلیونه مینه وال یې درلودل تړلې ده.

د امریکا متحد ایالتونو د هنګري د صدراعظم ویکتور اوربان د کابینې پر مشر انتال روګان د فساد او خپلوي پالنې په تور لګیدلي بندیزونه لرې کړل.

د متحد ایالتونو د خزانې وزارت پرون په یوه بیان کې چې د دې وزارت پر ویبپاڼه خپور شوی دی له بندیزونو څخه د روګان د نوم د لرې کیدو خبر ورکړ.

د امریکا د بهرنیو چارو د وزارت ویاندې تامي بروس وویل، د بهرنیو چارو وزیر مارکو روبیو د سې شنبې په ورځ د هنګري بهرنیو چارو وزیرپیتر سیجارتو له دې پریکړې خبر کړ او څرګند یې کړه چې د اوږدې مودې په مخه دا ډول بندیز د واشنګتن د بهرني سیاست له ګټو سره په ټکر کې دی.

اوربان په اروپا کې د ولسمشر ټرمپ له سختو ملاتړیو څخه دی.

د امریکا د متحد ایالتونو د بهرنیو چارو وزیر مارکو روبیو د ترکیې له بهرنیو چارو وزیر هاکان فیدان سره د دوشنبې په ورځ ( اپریل ۱۴) خبرې وکړې.

د امریکا د بهرنیو چارو وزارت ویاندې ټامي بروس په یوه بیان کې د دې ټیلفوني مکالمې په اړه وویل چې دوی د ایران او د هغه د نیابتي ډلو لخوا د سیمه ییز امنیت او ثبات لپاره د خطرونو په اړه خبرې وکړې او د ترهګرۍ ضد همکارۍ او د ناټو د پیاوړتیا د اهمیت په برخو کې یې موافقه وکړه.

د امریکا د متحد ایالتونو ولسمشر ډونالډ ټرمپ یو ځل بیا د اوکراین پر ولسمشر انتقاد وکړ او د فرانس پریس اژانس په وینا، ښاغلي ټرمپ په غیرواقعي توګه ولودمیر زیلینسکي د میلیونونو کسانو د مرګ مسوول وباله.

ولسمشر ټرمپ ( د اپریل ۱۴) دا تور پورې کړ، نژدې شپږ اونۍ مخکې تر دې یې په سپینه ماڼۍ کې له ښاغلي زیلینسکي سره خبره اړولې وه.

ښاغلي ټرمپ د دوشنبې په ورځ خبریالانو ته وویل "د دریو کسانو له امله په ملیونونو خلک مړه شوې دي"

نوموړي زیاته کړه "راځئ چې پوتین لومړی کس وګڼو، خو راځئ چې بایډن دوهم کړو چې هیڅ نظر یې نه لاره او بیا زیلینسکي».

پوتین د ۲۰۲۲ کال په فبروري کې پر اوکراین د یرغل امر ورکړ.

ټرمپ بیا په زیلینسکي باندې خپل برید دوه چنده کړ، او زیاته یې کړه: "هغه تل هڅه کوي چې توغندي واخلي."

د متحده ایالاتو او اوکراین د ولسمشرانو ترمنځ اړیکې وروسته له هغه ترینګلې شوې چې ټرمپ په فبروري کې نړۍ حیرانه کړه او له روسیې سره یې خبرې اترې پیل کړې.

مشهوره سندرغاړې کټي پري، پېژندل شوې خبریاله ګایل کېنګ او د میلیاردر جیف بیزوس کوژدنه پيلوټه او پخوانۍ خبریاله لورین سانچز فضا ته لاړې.

له دوی سره په ننني سفر کې د ناسا پخوانۍ ساینسپوهه ایشا بووي، څېړونکې اماندا انګوین او فلم جوړونکې کېرین فلین هم ملګرې وې.

بلو اوریجین شرکت چې د میلیاردر جیف بیزوس دی نن دا ښځې په ټکساس کې په یوه راکټ کې فضا ته واستولې.

د راکټ سروکی ۱۰۵ کیلومتره پورته لاړ او تر شاوخوا لسو دقیقو وروسته بېرته په اتومات شکل ځمکې ته راستون شو.

د جاپان په اوساکا ښار کې د ۱۶۰ هېوادونو په ګډون د تفریحي ټکنالوژۍ، سوشي او نورو صنعتونو نندارتون جوړ شوی.

دا نندارتون چې تمه ده څو میاشتې دوام وکړي هدف یې په ټکنالوژۍ او نورو صنعتونو کې د ګډونوالو هېوادونو د پرمختګونو او لاسته راوړنو ښودل دي.

د اوکرایین برخې ته هم ګڼ خلک ورغلي وو چې اکثر نندارې ته وړاندې شوي توکي یې د یووالي، د اوکرایین د ازادۍ او دې ته ورته سمبولونه درلودل.

جاپان خپل وروستي ماډل روبوټونه نندارې ته اېښي.
د کوریا څانګه کې بیا بیلابیل ډوله سوشي خوراک ته وړاندې شول.

د پاکستان د صدر اعظم شهباز شریف دفتر په ایران کې د اتو پاکستاني کارګرو وژنه غندلې او له تهرانه یې غوښتي چې د پيښې عاملین پیدا او سزا ورکړي.

د شریف دفتر پرون یکشنبه ( د حمل ۲۴مه) په دې اړه اعلامیه خپره کړې ده.

د ازادۍ راډیو ایراني څانګې، راډیو فردا لیکلي چې یوشمېر وسله وال د شنبې په ورځ د سیستان بلوچستان ولایت د مهرستان ښار یوې فابریکې ته ننوتلي او پر پاکستاني کارګرو یې، چې په خوب کې وو، ډزې کړي دي.

د ایران د بهرنیو چارو وزارت هم د یکشنبې په ورځ دغه پیښه " ترهګریزه" وبلله او وې ویل د عاملانو د نیولو لپاره به یې لازم اقدامات وکړي.

رادیو فردا لیکلي چې د پیښې مسولیت " د بلوڅانو د ازادي غوښتونکي پوځ" په نوم بیلتون پالې پاکستاني ډلې او دغه راز جیش العدل ډلې منلی دی.

د "بلوڅانو د ازادي غوښتونکي پوځ" د متحده ایالتونو، اروپایي ټولنې، بریتانیا او د پاکستان د مرکزي حکومت له خوا د ترهګریزې ډلې په توګه پيژندل کیږي.