د هرات سیمه يیز چارواکي دا مني چې د چشت ولسوالۍ د مرمر ډبرې د کان یو شمېر پانګهوال د امنیتي ستونزو لپاره د دولت وسلهوالو مخالفینو ته پیسې ورکوي.
د هرات د والي ویاند جیلاني فرهاد ازادي راډیو ته ویلي چې دا کار غیرقانوني دی او د وسلهوالو ډلو د تقویه کېدو سبب ګرځي.
د هرات د سوداګرۍ او صنایعو خونې مشر سعد خطیبې وړاندې ازادي راډیو ته ویلي چې د کار پر مخ وړو پر وخت د خپل امنیت ټینګولو لپاره مجبور دي وسلهوالو ډلو ته باج ورکړي.
ښاغلي خطیبي زیاته کړه:
"په جبري ډول کله چې یوه وسلهواله ډله راځي او د خصوصي سکتور د کارکوونکو افراد تښتوي او دولت هم دا وړتیا نهلري چې دغه کسان د مخالفینو له منګولو وژغوري، نو دوی د یوه انسان د ژوند ژغورلو لپاره پیسې ورکوي، پهدې کې شک نشته."
د هرات سیمه ییزه اداره له پانګهوالو غواړي چې وسلهوالو ډلو ته د پیسو ورکولو پرځای کولای شي له حکومته د خپل امنیت خوندي کولو لپاره د ډېرو ځواکونو غوښتنه وکړي.
د هرات چشت ولسوالۍ کې د مرمر او رخام ډبرو نېژدې ۲۰ کانونه د استخراج په حال کې دي چې کارونه یې د امنیتي ستونزو له کبله ځينې وختونه په ټپه درېږي.