د کندز ولایت اوسېدونکي وايي چې له دوه ورځو راهیسې وسلهوالو طالبانو د کندز–تخار لویه لار په اوږدو کې د افغان امنیتي ځواکونو پر امنیتي پوستو برېدونه پیل کړي چې په پایله کې یې د دولتي ځواکونو یو شمېر امنیتي پوستو سقوط کړی.
د دغو خلکو د خبرو پر بنسټ له دوه ورځو راهیسې د کندز–تخار لویه لاره هم د ترافیکو پر مخ تړلې چې له کبلهیې د شمال ختیځ زون اوسېدونکي له ستونزو سره مخ دي.
څو تنو مسافرو په دې اړه ازادي راډیو ته وویل:
"د کندز– تخار لاره له دوو ورځو راهیسې بنده ده، موږ له ډېرو ستونزو سره مخ یو، له دولته غواړو چې دغه لاره خلاصه کړي، څو خلک پر دغې لارې تګ راتګ وکړي."
"دوه ورځې شوي چې د کندز–تخار لویه لاره تړلې چې له املهیې خلک له ډېرو ستونزو سره مخامخ دي، خو دولت د دې لارې خلاصولو ته هېڅ پاملرنه نهکوي."
دغه مسافرین د کندز له سیمهییزو چارواکو غواړي، څو دغه لویه لاره ډېر ژر پرانیزي څو خلک تخار، بدخشان او کندز ته په ډاډه زړه تګ راتګ وکړي.
بلخوا د کندز امنیه قوماندانۍ د امنیت امر محمد معصوم هاشمي هم وايي چې د کندز–تخار د لويې لارې په اوږدو کې د دولتي ځواکونو درې امنیتي پوستو سقوط کړی.
نوموړی زیاتوي چې د دې لويې لارې د خلاصولو په هدف تصفیوي عملیات روان دي.
ښاغلي هاشمي زیاتوي:
"زه همدا اوس د کندز–تخار پر لويه لاره کې یم، زموږ درې پوستو تکتیکي شا تګ کړی وو، خو اوس زموږ عملیات روان دي څو دغه پوستې بېرته ونیسو او لاره هم خلاصه کړو."
د کندز ولایت اوسېدونکي وایي چې له دوه ورځو راهیسې وسلهوالو طالبانو په چهاردرې، امام صاحب او خانآباد او د کندز مرکز اړوند سیمو کې خپلو حملو ته زور ورکړی چې له کبلهیې د دې ولایت اوسېدونکي اندېښمن کړي.
د یادونې وړ ده چې څلور میاشتې وړاندې هم وسلهوالو طالبانو پر دغې لويې لارې د افغان امنیتي ځواکونو پر امنیتي پوستو برېدونه کړي چې په پایله کې دغه لویه لاره د پنځو ورځو لپاره د ترافیکو پر مخ تړلې وه.
په ورته وخت کې ذبیحالله مجاهد چې ځان د وسلهوالو طالبانو ویاند معرفي کوي وايي چې دوی د کندز –تخار د لويې لارې په اوږدو کې د دولتي ځواکونو یو زیات شمېر امنیتي پوستې نیولي همدارنګه افغان ځواکونو ته د مرګ ژوبلې ادعا هم کوي.
راپور: اجمل ارین
