د ناټو عمومي منشي وايي، په وارسا کې به د دې تړون د مشرانو تر غونډې وروسته له روسیې سره رسمي خبرې وکړي.

داسې تمه کیږي چې د وارسا غونډه به د ناټو او روسیې ترمنځ اختلاف نور هم ژور کړي.

د ناټو – روسیې شورا وروستۍ غونډه له دوه کلن ځنډ وروسته د اپریل په میاشت کې کړې وه خو دا خبرې د اوکراین او ځیني نورو مسئلو پر سر په اختلافاتو پای ته ورسېدې.

د جمعې په ورځ په وارسا کې د ناټو د مشرانو غونډه جوړیږي. تر دې مخکې د دوشنبې په ورځ د ناټو عمومي منشي ینس سټولټنبرګ خبریالانو ته وویل، د ناټو – روسیې شورا د تفاهم په رامنځ ته کولو کې مهم رول لري او کولای شي چې د دواړو لورو راتلونکې خوځښتونه یو بل ته روښانه کړي.

سټولټنبرګ وايي، له همدې کبله له روسیې سره کار کوي چې د وارسا له غونډې وروسته د ناټو ـ روسیې شورا یو بله غونډه جوړه کړي.

د ناټو عمومي منشي ویلي، ناټو غوښتل چې د وارسا تر سرمشریزې مخکې له روسیې سره خبرې وکړي خو له روسیې سره په دې اړه توافق ته ونه رسېدل.

ټاکل شوې چې د وارسا په غونډه کې به د ناټو د غړیو هېوادونو مشران پر نورو مسئلو سربېره، په پولنډ او د بالتیک هېوادونو کې د ناټو د پوځي حضور په پیاوړتیا او دغلته د سرتېرو د ځای پر ځای کولو په اړه بحثونه وکړي.

د روسیې په لیرې خیتځ کامچاتکا کې د وروستۍ زلزلې له کبله له پنځو پیړیو وروسته اورشیندی یا اتشفشان فعاله شوی دی.

په روسیه کې د اورشیندي پېژندنې نړیوال پروګرام وايي، دغه اورشیندی د وروستي ځل لپاره په ۱۵۵۰ کال کې په دې سیمه کې رامنځته شوې وه.

د کامچاتکا د بیړنیو خدمتونو ادارې ویلي، له کراشنینکوف اورشیندی پورته شوي چې د ایرو لوخړه يې ۶کیلو مټره لوړه ده چې خیتځ ته د ارام سمندر پر لور روانه ده.

روسي کارپوهانو خبرداری ورکړی و چې د چهارشنبې د ورځې له ۸ اعشاریه ۸ درجې زلزلې وروسته ښايي په سیمه کې د څو اونیو لپاره له زلزلې وروسته ټکانونه پېښ شي.

د یکشنبې پر ورځ ۸ اعشاره ۸ درجې زلزلې د کوریل ټاپوګان ولړزول.

دا زلزله، چې د کامچاتکا ټاپووزمې په پتروپاولوفسک کې وشوه، له ۲۰۱۱ کال راهیسې دغلته د شویو زلزلو تر ټولو ځواکمنه هغه وه.

له دې ځواکمنې زلزلې وړاندې په ۲۰۱۱کال کې په جاپان کې د ریښتر په ۹اعشاره ۱درجه زلزله شوې وه چې څه باندې ۱۵زره کسان په کې وژل شوي وو.

د ملګرو ملتونو د کډوالو اداره وايي، د یمن په سواحلو کې د یوې کښتۍ د ډوبیدو له کبله ۶۸کسان مړه او ۷۴ نور نادرکه دي.

د دغې ادارې په ټکو، پېښه پرون یکشنبې رامنځته شوې او په کښتۍ کې سپارو کډوالو غوښتل ځانونه د عربو مالداره هېوادونو ته ورسوي.

په یمن کې د ملګرو ملتونو د کډوالو ادارې مشر اسوشتیدپریس خبري اژانس ته ویلي، په کښتي کې ۱۵۴کسان سپاره چې ډیر شمیر د اتیوپی اتباع وو.

د هغه په خبره، د ۵۴ډوب شویو کسانو جسدونه يې موندل او ۱۴نور کسان لا نادرکه دي.

له دغې پېښې ۱۲کسان ژوندي پاتي او د دې احتمال شته چې ناردکه کسان مړه وي.

بل پلو، رویترز خبري اژانس وايي، په کښتۍ کې ۱۵۰کسان سپاره وو چې یوازې نهه يې ژوندي پاتي دي.

له دې وړاندې د یمن په سواحلو کې د یوې بلې کښتۍ د ډوبیدو په پېښه کې دوه کسان مړه او ۱۸۶ نور ناردکه شوي وو.

په روم کې د پاپ لیو څوارلسم سره په یوه ډله ییزه غونډه کې تر یو ملیون زیاتو کسانو ګډون وکړ.

د یکشنبې په ورځ، له 146 هیوادونو څخه تر یو ملیون زیات کسان د روم په یوه پوهنتون کې د پاپ لیو څوارلسم سره د ځوانانو د نړیوالې ورځې په مراسمو کې راټول شول.

پاپ پر موټرسایکل راغی او د تود هرکلی یې وشو.

هغه له ځوانانو وغوښتل چې "د خدای سره د تلپاتې کیدو پر لور لاړ شي."

دا تر دې دمه د لومړي امریکایی پاپ تر مشرۍ لاندې ترټولو لویه غونډه وه.

په عیسوي دود کې، په ځانګړې توګه کاتولیکزم کې، د ځوانانو نړیواله ورځ د پوپ د بخښنې، پخلاینې او د عقیدې د نوي کولو وخت ګڼل کیږي.

د روسیې په ساحلي ښار سوچي کې هوايي ډګر ته نژدې د اوکرایني بې پیلوټه الوتکو تر برید وروسته د تیلو یوه ټانک اور واخیست.

سیمه ییزو چارواکو ویلي چې اور هغه وخت ولګېد چې د لوېدلي ډرون ټوټې د تیلو ذخیره کولو له تاسیساتو سره ولګېدې.

د سیمې د والي په وینا، د اور د کنټرول لپاره تر ۱۰۰ زیات ژغورونکي او ۳۵ د اور وژنې ماشینونه د اور وژنې ځای ته لېږل شوي دي.

پر ټولنیزو رسنیو خپرې شوې ویډیوګانې ښیې چې یوه بې پیلوټه الوتکه تر چاودنې مخکې ساحې ته نژدې کیږي، خو دا ويډیوګانې په خپلواکه توګه نه دې تایید شوې.

د سوچي نړیوال هوایی ډګر د ډرون د تهدید له امله په موقتي ډول تړل شوی و، خو د یکشنبې په سهار بیرته پرانیستل شو.

د روسیې دفاع وزارت ویلي چې دوی د شپې په تور سمندر او نورو سیمو کې تر ۹۰ زیات اوکرایني ډرونونه ویشتلي دي، خو د زیان یا تلفاتو د کچې په اړه یې هیڅ توضیحات نه دي ورکړي.

پر اوکراین پراخه جګړه د ۲۰۲۲ کال په فبروري کې د مسکو پیل کړې وه.

د کریملین نژدې سیاستوالو او کارپوهانو روسیې ته نژدې د امریکا د دوو اټومي اوبتلونو ځای پر ځای کول، کم اهمیته بللي دي.

د امریکا ولسمشر ډونالډ ټرمپ د جمعې په ورځ اعلان وکړ چې دغه اوبتلونه یې یوه مناسب ځای ته استولي دي.

د ډي.پي. اې خبري اژانس د راپور له مخې، د روسیې د پارلمان یا دوما مرستیال لیونېډ ایولیف تاس خبري اژانس ته ویلي، د دوو اټومي اوبتلونو ځای پر ځای کول، د روسیې ملي امنیت ته کوم ګواښ نه دی.

ټرمپ له روسیي چارواکو سره تر اختلاف وروسته د خپلو سمندري ځواکونو دوه اټومي اوبتلونه روسیې ته نژدې ځای پر ځای کړل.

ډونالډ ټرمپ تیره اونۍ د روسیې ولسمشر ته ۱۰تر ۱۲ ورځو مهلت ورکړ چې د اوکراین جګړه پای ته ورسوي، که نه بندیزونه به پرې ولګوي.

د فلسطین د سرې میاشتې ټولنې نن یکشنبه ( د زمري ۱۲مه) اعلان کړی چې د غزې خان یونس کې د دوی پر دفتر د اسراییلو برید کې یې یو کارکوونکی وژل شوی دی.

د فرانس پریس په خبره، دغه برید دوه ورځې وروسته تر هغه کیږي چې د منځني ختیځ لپاره د امریکا ځانګړي استازي سټیف ویټکوف په غزه کې د مرستې رسونې له هغه مرکزه لیدنه وکړه چې متحده ایالتونه یې ملاتړ کوي.

ملګرو ملتونو خبرداری ورکړی چې د غزې له جګړې نژدې دوه کاله وروسته غزه د بشپړې قحطۍ په درشل کې ده.

د غزې د عامې روغتیا وزارت وایي، د اسراییل په جګړه کې تراوسه له شپیته زره او درې سوو څخه زیات کسان وژل شوي، ملګرو ملتونو دغه شمیرې د باور وړ بللې دي.

د ایران ولسمشر مسعود پزشکیان پاکستان ته سفر کړی دی.

د ایران او پاکستان چارواکو ویلي چې پزشکیان به په دې دوه ورځني سفر کې له پاکستاني چارواکو سره په دوه اړخیزو اړیکو خبرې وکړي.

دا د ولسمشر په توګه پاکستان ته د پزشکیان لومړنی سفر دی.

پاکستان پرون جمعه وویل، چمتو دی چې د امریکا او ایران ترمنځ د نانندریو په کمولو کې رول ولوبوي.

پر روسیې د اوکراین د تیرې شپې هوایي بریدونو کې لږ تر لږه درې تنه وژل شوي دي.

د روسیې دفاع وزارت ویلي، اوکراین د کریمیا ټاپوزمې په ګډون د روسیې پر اتو سیمو باندې ۱۱۲ بې پيلوټه الوتکې توغولي دي.

دفاع وزارت ویلي، د هوایي دفاع سیستم یې دا الوتکې نسکورې یا ویجاړې کړي دي.

په روستوف، پینزا او سمارا سیمو کې دغو بریدونو درې تنه وژلي، یوشمیر یې ټپيان کړي او ځینو سیمو کې اور هم لګېدلی دی.

نن سهار مهال د سمارا هوایي ډګر فعالیت هم په موقتي ډول وځنډول شو.

د امریکا د بهرنیو چارو وزارت وایي چې په موقتي ډول یې د پاکستان د کراچۍ ښار هوټلونو ته د امریکا د حکومتي غړیو پر تګ محدودیتونه لګولي دي.

د بهرنیو چارو وزارت د جمعې په ورځ په یوه بیان کې وویل چې په کراچۍ کې د امریکا جنرال قونصلي داسې راپور ترلاسه کړی دی چې په هغه کې امریکایانو ته د کراچۍ هوټلونو ته د ورتګ ګواښ شوی دی.

رویټرز اژانس څرګندوي چې د امریکا د بهرنیو چارو وزارت خپلو ټولو اتباعو ته خبرداری ورکړی دی چې د ترهګرۍ د خطر او د احتمالي وسله والې شخړې له امله دې، پاکستان ته په خپل سفر له سره غور کوي.

د امریکا ولسمشر ډونالډ ټرمپ وايي چې د برازیل ولسمشر لویز اناسیو لولا دا سلوا کولی شي هر وخت ورسره اړیکه ونیسي.

د جمعې په ورځ (د اګست لومړۍ نیټه) په سپینه ماڼۍ کې خبریالانو سره په خبرو کې، ټرمپ د برازیل ولسمشر په اړه وویل چې "هغه کولی شي هر وخت له ما سره خبرې وکړي او د هیوادونو ترمنځ د تعرفو او نورو شخړو په اړه بحث وکړي."

د رویټرز اژانس په وینا، ولسمشر ټرمپ په برازیل باندې ۵۰ سلنه تعرفه لګولې ده، چې سر له راتلونکې اونۍ به پیل شي.

متحده ایالاتو د برازیل د سترې محکمې پر قاضي هم بندیزونه لګولي دي.

د برازیل ولسمشر لویز اناسیو لولا دا سلوا بندیزونه او تعرفې رد کړې دي، او هغه یې "ناعادلانه" او د خپل هیواد په قضايي سیسټم کې "نه منلو وړ" لاسوهنه بللې ده.