عراق وایي، د هغې سیمې دوه دریمه برخه یې بیرته نیولې چې په ۲۰۱۴ کال د اسلامي دولت ډلې په چټک پرمختګ کې لاندې کړې وه.

د حکومت ویاند سعد الحدیثي پرون په ټلویزیوني خبرو کې وویل چې د عراق په ښارونو او ولایتونو کې د داعش حضور کمزوری شوی دی.

دې ډلې چې د عراق د خاورې په سلو کې ۴۰ یې لاندې کړې وه، اوس یوازې ۱۴ فیصده خاوره په لاس کې لري.

د عراق پوځ، د کورد پیشمرګه ځواک، شیعه ملیشو او سوني قبایلي وسله والو په مرسته چې ټول د امریکا په مشرۍ د ایتلافي ځواکونو له ملاتړه برخمن دي، په تېر یوه کال کې د رمادي، تکریت او باجي په ګډون یو شمېر ښارونه له داعشه بیرته نیولي دي.

خو له دې سره سره اسلامي دولت ډله توانیدلې چې په هغو سیمو کې چې د دولت تر کنټرول لاندې سیمې بلل کیږي، خونړۍ حملې ترسره کړي.

د اسراییلو صدراعظم بنیامین نتانیاهو وايي، اسراییل باید په غزه کې د حماس له "ماتې" ډاډمن شي څو د برمته شویو کسانو ازادي تضمین کړي.

فرانس پریس خبري اژانس لیکلي، نتانیاهو دغه څرګندونې د اسراییلو د پوځ له یوه تعلیمي مرکز د لیدنې پرمهال پرون سه شنبې کړي دي.

د هغه په ټکو، "دا مهمه ده چې د حماس ډله په کامله توګه ماتې وخوري، برمته شوي ازاد او باید اطمینان ترلاسه شي چې غزه نور د اسراییلو لپاره خطر نه جوړوي".

نتانیاهو دا څرګندونې داسې مهال کوي چې د ملګروملتونو کارپوهانو په غزه کې د شدیدې قحطۍ خبرداری ورکړی دی.

په وروستیو څو اونیو کې په غزه کې په لسهاوو کسان د لوږې له کبله مړه شوي دي.

د روسیې د میلیاردر سلیمان کریموف قیمتي کښتۍ د مزایده له لارې پلورل کیږي.

کریموف چې د امریکا د تحریمونو په لیست کې دی، دا قیمتي کښتۍ په ۲۰۲۲کال کې د امریکايي چارواکو له خوا ضبط شوه.

دغه کښتۍ د مادیا په نوم یادیږي چې ۱۶۰ متره اوږدوالی، د هلیکوپټرو د ناستې میدان، د لامبا حوضونه، جکوزي، ورزشي کلپونه، ارایشګاه او د خوب اته کوټې لري چې په یو وخت په کې ۱۶ کسان اوسیدلی شي.

د دغې کښتۍ ارزښت څه باندې ۳۰۰میلیون ډالره دی.

پر اوکرایین د روسیې له یرغل وروسته امریکا پر کریموف بندیزونه ولګول.

تېر کال د امریکا کانګرس یو قانون تصویب کړ چې له مخې يې امریکا له روسانو ضبظ شوې شتمني خرڅه او عواید اوکرایین ته د بشري مرستو په توګه واستوي.

نن د اګست شپږمه د اټومي بم د لومړي برید ۸۰مه کلیزه ده.

د رویترز خبري اژانس د راپور له مخې، دغه اټومي بم د لومړی ځل لپاره په ۱۹۴۵کال کې د سهار په ۸:۱۵دقیقو کې د امریکا یوې B-29 بم وړونکې الوتکې چې ۱۰زره پونډه یورانیم په کې ځای پرځای شوي وو د جاپان پر هیروشیما ښار وغورځاوه.

د دغه بم په برید کې شاوخوا۷۸زره کسان ووژل شول چې د همغه کال تر پایه د وژل شویو کسانو شمیر ۱۴۰ زره کسانو ته پورته شو.

له دې برید وروسته امریکا د اګست په نهه یو بل اټومي بم د جاپان په ناګاساګي ښار وغورځاوه چې تر ۷۰زرو ډیر کسان په کې ووژل شول.

جاپان له دې بریدونو وروسته د اګست په ۱۵مه تسلیم او ورسره دویمه نړیواله جګړه پای ته ورسیده.

د روسیې د ارام سمندر بحري ځواکونه وايي، له چین سره يې د "۲۰۲۵کال د سمندري تعامل" په نوم ګډ پوځي تمرینات ترسره کړي.

د روسیې چارواکو په خبره، په دغو تمریناتو کې په لسګونو بیړیو، اوبټلو، جنګي بیړو، د اوبو لاندې ژغورونکو اوبټلو او د دواړو هېوادو د اوبو لاندې ډیزلي او برقي کښتو برخه درلوده.

له دې وړاندې دواړو هېوادونو د اګست په لومړی نیټه د روسیې په ولادیوستوک ښار کې ورته پوځي بحري تمرینات ترسره کړې وو.

دغو هېوادونو د اګست له دریمې تر پرونه د جاپان په سمندرګي کې رسما بحري پوځي تمرینات وکړل.

د ازادي راډیو د خبر مرکزي څانګه لیکي، دا چین او روسیې ګډ پوځي تمرینات د دواړو هېوادونو د ژورو اړیکو او همکاریو نښه ده.

له ۲۰۰۳کال راهیسې مسکو او بیجنګ ۱۱۳ځله ګډ پوځي تمرینونه ترسره کړي چې سم نیمايي یوازې په تیرو شپږو کلونو کې ترسره شوي دي.

د اسراییلو د مرستو د همغږۍ پوځي اداره وايي، " غزې ته د سیمه ییزو سوداګرو د مالونو انتقال ته په تدریجي ډول اجازه ورکوي".

دغې ادارې نن سه شنبې ویلي، غزې ته د لا ډیرو بشري مرستو د انتقال په موخه د اسراییلو کابینې یو میکانیزم تصویب کړی چې اجازه ورکوي د سوداګرو مالونه هم غزې ته ورسیږي.

د دغې ادارې په ټکو، په تصویب شویو مالونو کې خواړه، میوه، سبزي، د ماشومانو لپاره ځانګړي خواړه او روغتیايي لوازم شامل دي.

د ملګرو ملتونو او فلسطیني چارواکو په خبره، د غزې خلکو ته د بشري مرستو د رسولو په موخه هره ورځ څه باندې ۶۰۰ لارو بشري مرستو ته اړتیا ده.

د ملګرو ملتونو په ګډون نړیوال ادارې ویلي، د غزې نژدې دوه میلیونه اوسیدنکی له قحطی سره مخ دي.

په وروستیو څو میاشتو کې په غزه کې د لوږې له کبله په سلهاوو کسان مړه شوي دي.

د اوکرایین په خارکیف ښار کې د انرژۍ پر تاسیساتو د روسیې په تازه بریدونو کې یو کس وژل شوی او لس تنه نور ټپیان دي.

دا بریدونه نن سهار سه شنبې شوي چې د خارکیف د مهمې سیمې لوزوا ترانسپورټي سیستم يې مختل کړی دی.

د لوزوا د ښاروال سرهي زلنسکي په خبره، روسیې په دې بریدونو کې د انرژۍ د تاسیساتو سربیره شخصي ودانۍ او کورونه هم په نښه کړي دي.

بل پلو، د اوکرایین هوايي مدافع ځواکونو د ۲۹ بې پیلوټه الوتکو د نسکوریدو خبره کړې ده.

په عین حال کې د روسیې د دفاع وزارت ادعا کړې چې تیره شپه يې د اوکرایین ۲۴بې پیلوټه الوتکې نسکورې کړي دي.

د اوکراین ولسمشر د دوشنبې په ورځ وویل چې د اوکراین عسکر د هیواد په شمال ختیځ کې له بهرنیو کرایي جګړه مارانو سره په جګړه بوخت دي. د ولادیمیر زیلینسکي په وینا دا جګړه ماران له بیلابیلو هیوادونو لکه پاکستان، چین او د افریقا له ځینو برخو ورغلي دي.

د اوکراین ولسمشر تر دې مخکې هم مسکو تورن کړی و چې د اوکراین پرضد جګړه کې د چینایي جګړه مارو ګمارنه کوي، خو پیکنګ دا تورونه رد کړې دي.

رویټرز اژانس څرګندوي چې ښاغلي زیلینسکي د اوکراین په شمال ختیځ کې په خارکیف کې د جګړې له کرښې څخه تر لیدو وروسته په ایکس کې ولیکل چې د دوی پوځیان د چین، تاجکستان، ازبکستان، پاکستان او د افریقایي هیوادونو د کرایي جګړه مارانو راپورونه ورکوي چې دا کسان به بې ځوابه پاتې نه شي.

تمه ده چې د امریکا د متحد ایالتونو د ولسمشر ځانګړی استازی ستیف ویتکاف سبا یا بل سبا روسیې ته ولاړ شي او هلته له روسیي چارواکو سره د اوکراین د جګړې د ختمیدو په تړاو خبرې وکړي.

ډونالډ ټرمپ پرون خبریالانو ته وویل چې ویتکاف به د چهارشنبې یا پنجشبې په ورځ روسیې ته سفر وکړي.

دا سفر په داسې وخت کې ترسره کیږي چې ښاغلي ټرمپ روسیې ته تر راتلونکې جمعې مهلت ورکړی دی چې داسې یوه معامله دې وکړي چې ورسره د اوکراین درې نیم کلنه جګړه پای ته رسیږي.

د کرملین ویاند دیمتري پیسکوف پرون وویل چې دوی تل دې ته خوشالیږي چې ښاغلی ویتکاف په مسکو کې وویني.

د امریکا ولسمشر ویلي دي، که مسکو د اګست تر اتمې نیټې د اوکراین د جګړې په تړاو یو تړون ونه کړي، بندیزونه به پرې ولګول شي او لوړې تعرفې به پرې وضع شي.

د روسیې په لیرې خیتځ کامچاتکا کې د وروستۍ زلزلې له کبله له پنځو پیړیو وروسته اورشیندی یا اتشفشان فعاله شوی دی.

په روسیه کې د اورشیندي پېژندنې نړیوال پروګرام وايي، دغه اورشیندی د وروستي ځل لپاره په ۱۵۵۰ کال کې په دې سیمه کې رامنځته شوې وه.

د کامچاتکا د بیړنیو خدمتونو ادارې ویلي، له کراشنینکوف اورشیندی پورته شوي چې د ایرو لوخړه يې ۶کیلو مټره لوړه ده چې خیتځ ته د ارام سمندر پر لور روانه ده.

روسي کارپوهانو خبرداری ورکړی و چې د چهارشنبې د ورځې له ۸ اعشاریه ۸ درجې زلزلې وروسته ښايي په سیمه کې د څو اونیو لپاره له زلزلې وروسته ټکانونه پېښ شي.

د یکشنبې پر ورځ ۸ اعشاره ۸ درجې زلزلې د کوریل ټاپوګان ولړزول.

دا زلزله، چې د کامچاتکا ټاپووزمې په پتروپاولوفسک کې وشوه، له ۲۰۱۱ کال راهیسې دغلته د شویو زلزلو تر ټولو ځواکمنه هغه وه.

له دې ځواکمنې زلزلې وړاندې په ۲۰۱۱کال کې په جاپان کې د ریښتر په ۹اعشاره ۱درجه زلزله شوې وه چې څه باندې ۱۵زره کسان په کې وژل شوي وو.

د ملګرو ملتونو د کډوالو اداره وايي، د یمن په سواحلو کې د یوې کښتۍ د ډوبیدو له کبله ۶۸کسان مړه او ۷۴ نور نادرکه دي.

د دغې ادارې په ټکو، پېښه پرون یکشنبې رامنځته شوې او په کښتۍ کې سپارو کډوالو غوښتل ځانونه د عربو مالداره هېوادونو ته ورسوي.

په یمن کې د ملګرو ملتونو د کډوالو ادارې مشر اسوشتیدپریس خبري اژانس ته ویلي، په کښتي کې ۱۵۴کسان سپاره چې ډیر شمیر د اتیوپی اتباع وو.

د هغه په خبره، د ۵۴ډوب شویو کسانو جسدونه يې موندل او ۱۴نور کسان لا نادرکه دي.

له دغې پېښې ۱۲کسان ژوندي پاتي او د دې احتمال شته چې ناردکه کسان مړه وي.

بل پلو، رویترز خبري اژانس وايي، په کښتۍ کې ۱۵۰کسان سپاره وو چې یوازې نهه يې ژوندي پاتي دي.

له دې وړاندې د یمن په سواحلو کې د یوې بلې کښتۍ د ډوبیدو په پېښه کې دوه کسان مړه او ۱۸۶ نور ناردکه شوي وو.