د افغانستان د ښځینه وو والیبال ملي ټیم کپټانه پېژنۍ؟
په افغانستان کې د طالبانو د واکمنۍ تر ختمېدو ورسته نجونو د تعلیم او هنر ترڅنګ سپورټ ته هم مخه کړه؛ د افغانستان د ښځینه وو د والیبال ملي ټیم اوسنۍ کپټانه فروزان هادي هم یوه له هغو نجونو څخه ده؛ چې د نوي حکومت تر جوړېدو وروسته یې والیبال پیل کړ. فروزان هادي د بغلان ولایت اوسېدونکې ده، څو کاله مخکې کابل ولایت ته راغله، تر ډېرو هڅو او زیار ورسته د والیبال ملي ټیم غړې او بیا کپټانه شوه؛ چې په هېواد کې دننه یې ډېرې سیالۍ ترسره کړي، خو یوه سیالۍ یې په تاجکستان کې کړې او په راتلونکي کې له هېواد څخه بهر د نورو سیالیو پلان هم لري.
