حقاني او ژاو شینګ پرون په کابل کې په دې لیدنه کې د واخان دهلیز د ستراتیژيک اهمیت، د سوداګریزو اړیکو د پراختیا او د مسافر وړونکو الوتنو د زیاتېدو په اړه بحثونه کړي.
په دې ناسته کې د بیان له مخې دواړو لوریو د دوه اړخیزو همکاریو په لا پیاوړتیا او د عملي ګامونو پر اړتیا ټینګار کړی دی.
د طالبانو د کورنیو چارو وزیر او د چین سفیر داسې وخت د واخان د ستراتیژيک اهمیت په اړه خبرې کړي چې دا څو وروستۍ ورځې پاکستان ته نږدې ځینې حلقاتو په خواله رسنیو باندې داسې ګنګوسې خپرې کړي چې ګواکې پاکستاني پوځیان په واخان دهلیز/کوریدور حاکم شوي او غواړي دا سیمه ونیسي.
دې چارې د ګڼو فعالانو او خلکو غبرګونونه او اندېښنې پارولي دي.
واخان افغانستان او چین سره نښلوي او دواړه هېوادونه شاوخوا اتیا کیلومتره ګډه پوله لري.
واخان
د دغه دهلیز شمال ته تاجکستان، جنوب ته پاکستان او ختیځ ته د چین سینکیانګ ولایت پروت دی.
شاوخوا دوه کاله مخکې هم راپورونه خپاره شول چې پاکستاني ځواکونه هڅه کوي په واخان کې سرحدي نښې له منځه یوسي.