اسراییلو پرون د حزبالله یوبل جګپوړی قوماندان د پلازمېنې بیروت په جنوبي لمنو کې په یوه هوايي حمله کې وواژه.
د اسراییلو پوځ په یوه بیان کې وویل چې عقیل د ایران پلوې حزبالله ډلې د پوځي څانګې مهم مشر و او په عین حال کې یې د رضوان په نوم د دې ډلې د ځانګړي ځواک سرپرستي هم کوله.
د بیان له مخې عقیل د حزبالله له ۱۰ نورو جګپوړو پوځي قوماندانانو سره یوځای وژل شوی دی.
د اسراییل پرونی برید، وروسته له دې چې د حزبالله د مخابرې په وسایلو کې چاودنو ۳۷ کسان ووژل او زرګونه نور یې ټپیان کړل، دې ډلې ته یوه بله لویه ضربه بلل کېږي.
باور دا دی چې دا حمله به هم اسراییلو کړې وي، خو اسراییلو دا احتمال نه رد کړی او نه تایید کړی دی.