د افغانستان د فوټسال ملي لوبډلې نن دوشنبه د سپټمبر په ۲یمه نېټه د ګواټیمالا پر وړاندې سیالي ترسره کړه چې ۵-۴ افغانستان وګټله.
د افغانستان فوټبال فدراسیون د خبر پر اساس، دغه سیالي چې د انټرکانټینټال جام سیالۍ دي د تایلینډ په کوربهتوب ترسره کېږي.
د افغانستان او ګواټیمالا سیالي نن دوشنبه د کابل پر وخت تر غرمې وروسته ۲:۰۰ بجې پیل شوې وه چې د لوبې تر پایه افغانستان ۵ او ګواټیمالا ۴ ګولونه ووهل.
دا په روانو سیالیو کې د افغانستان لومړۍ لوبه وه.
ټاکل شوې چې سبا سې شنبه افغان لوبډله د کوېټ پر وړاندې سیالي وکړي.
د یادو سیالیو موخه د فوټسال راتلونکي نړیوال جام لپاره چمتوالی دی چې د روانې سپټمبر میاشتې په ۱۴مه نېټه به د ازبکستان په کوربهتوب پیل شي.