د قطر په پلازمېنه دوحه کې د مذاکرو په هغه نوي پړاو کې چې پرون پیل شو، د امریکا متحدهایالتونو، قطر او مصر برخه درلوده، چې د اسرايیل له هیئت سره یې وکتل.
د دغو خبرو هدف په غزې تړانګه کې د اسرايیل او حماس ترمنځ د جګړې ختمول، د حماس له بنده د لسګونو یرغمل شویو خلاصون او سیمې ته د دې جګړې د خپرېدو مخنیوی ښوول شوی دی.
سپینې ماڼۍ پرون له ټولو اړخونو په غزه کې د اوربند د ټینګښت په اړه په خبرو کې د برخې اخیستو غوښتنه وکړه.
د سپینې ماڼۍ د ملي امنیت شورا ویاند جان کربي په هغه مرکه کې چې د امریکا له CNN ټلوېزیوني شبکې پرون خپره شوه ویلي، په غزه کې د اوربند د ټینګښت لپاره په مذاکرو کې لا هم د پرمختګ امکان شته.
کربي ویلي د دوی معلومات ښيي، چې ایران په ځانګړي ډول د خپلو نیابتي ډلو لهخوا پر اسرايیل د حملې له خبرداریو لا هم لاس نهدی اخیستی.
پهدې اړه یوې سرچینې چې نوم یې نهدی اخیستل شوی، د فرانسې خبري اژانس ته ویلي، پرونیو خبرو کې د اسرايیل استازی او د امریکا د مرکزي استخباراتو مشر ویلیم برنز شامل وو.
د سپینې ماڼۍ د ملي امنیت شورا ویاند جان کربي
د اسوشېټېډ پریس اژانس د راپور لهمخې حماس ډلې چې په دغو خبرو کې په مستقیم ډول شامل نه و، پر اسرايیل تور لګولی چې تازه غوښتنې یې مطرح کړي دي.
د امریکا متحدهایالتونه او اروپايي ټولنه توندلارې ډله حماس، یو تروریستي سازمان ګڼي.
په همدې حال کې د حماس تر ولکې لاندې د غزې روغیا وزارت پرون وویل، چې د اکتوبر میاشتې له اوومې په روانه جګړه کې د وژل شویو کسانو شمېر ۴۰زرو ته ورسېد.
ویل شوي چې په غزه کې به یو اوربند ښايي په ټوله سیمه کې د کړکېچ له کمېدو سره مرسته وکړي.
ډیپلوماتانو هیله ښوولې چې دا اوربند به ایران او د لبنان حزبالله ډله کړکېچ ته له لمن وهلو راوګرځوي.
په دې اړه نور: غزه کې روغتيا وزارت: تر اوسه د حماس او اسراييل ترمنځ جګړه کې تر ۴۰زره ډېر کسان وژل شويایران او حزبالله ډلې د حزبالله د یوه لوړ رتبه قوماندان او د حماس ډلې د سیاسي څانګې د مشر اسماعیل هنیه تر وژل کېدو وروسته د غچ اخیستو خبرداری ورکړی و.
اسرايیل وايي د حزبالله مخکښ قوماندان فواد شکر د جولای پر ۳۰مه د لبنان د پلازمېنې بیروت په څنډه کې د هوايي حملې له کبله ووژل شو.
د حماس د سیاسي څانګې مشر اسماعیل هنیه د جولای میاشتې پر ۳۱مه د ایران په پلازمېنه تهران کې یوه حمله کې ووژل شو، چې ایراني چارواکو د اسرائیل کار بللی دی.