د شپږیزې لیګ د درېیمې ورځې په لومړۍ لوبه کې د بُست ساتونکو لوبډلې په سوپر اور کې د بند امیر ښامارانو لوبډلې ته ماتې ورکړه.
د چهارشنبې په ورځ د کابل په سهار ۹:۰۰ بجې بُست لوبډلې لومړۍ توپوهنه ترسره کړه چې په ټاکلو شلو اورونو کې یې د ۸ لوبغاړو تر سوځېدو وروسته ۱۷۹ منډې وکړې.
د بُست په توپوهونکو کې محمدشهزاد محمدي ۴۶ او ګلبدین نایب ۳۰ منډې وکړې.
بند امیر ته بیا په توپ اچونه کې افتاب عالم ۳ او حمزه هوتک دوه لوبغاړي وسوځول.
بند امیر لوبډلې په شلو اورونو کې د ۸ لوبغاړو تر سوځېدو وروسته ۱۷۹ منډې وکړې، چې لوبه برابره شوه او بیا سوپر اور ترسره شو.
په سوپر اور کې بند امیر د ۱۲ منډو هدف ټاکلی و چې بُست لوبډلې د یوه لوبغاړي تر سوځېدو وروسته پوره کړ.
بند امیر ته په توپوهنه کې ریاض حسن ۵۴ او صدیق اتل ۳۳ منډې وکړې او د بُست په توپ اچونو کې بشیر احمد ۲ لوبغاړي وسوځول او د دې لوبې د غوره لوبغاړي جایزه یې وګټله.
د نن ورځې دویمه سیالي به د مس عینک اتلانو او سپین غر پړانګانو ترمنځ پیل شي.