د افغانستان کرکټ بورډ له لوري د شپږیزې لیګ د نهم پړاو په پیل شویو سیالیو کې بوست ساتونکو لوبډلې پهخپلې لومړۍ لوبې کې سپین غر پړانګانو ته د ۷ وېکټو په توپیر ماتې ورکړه.
د یادې لوبې پچه بوست لوبډلې ګټلې او توپ اچونه یې انتخاب کړې وه، سپین غر د ۷ لوبغاړو تر سوځېدو وروسته ۱۶۶ منډې وکړې.
د یادې لوبډلې په ګټه سمیعالله شینواري تر نورو زیاتې ۴۳ منډې کړې وې.
بوست ساتونکو ته بیا نوراحمد ۴ لوبغاړي وسوځول او د لوبې د غوره لوبغاړي جایزه یې وګټله.
بوست ورکړل شوی هدف یوازې د درې لوبغاړو تر سوځېدو وروسته په وروستي اور کې پوره کړ.
محمداکرم د بوست لپاره ۶۲ او ګلبدین نایب ۴۰ منډې وکړې.
دا په روانه شپږیزه کې د بوست لوبډلې لومړۍ بریا او د سپین غر دویمه ماتې وه.
بل لورته کرکټ بورډ په یو خبر کې ویلي چې د ملي لوبډلې لوبغاړی محمدنبي عیسی خیل هم په شپږیزه لیګ کې د لوبېدو په پار کابل ته رسېدلی دی.
محمدنبي په یوه ویډیوي پیغام کې ویلي چې یاد لیګ ورته ځانګړی ارزښت لري او هر ځل پهکې لوبېدلی دی.
کرکټ بورډ د راشدخان او رحمنالله ګربز د لوبېدو خبر هم ورکړی، خو یاد لوبغاړي لا کابل ته نه دي رسېدلي.
راشدخان چې د انګلستان د سل بالیزه ټورنمنټ په ترڅ کې د ټرینټ راکټ لوبډلې په ګټه لوبېده په وروستۍ لوبه کې د ټپي کېدو له امله له یاد ټورنمنټ بهر شوی دی.
لا څرګنده نه ده چې نوموړی به شپږیزې لیګ سیالیو ته راشي یا نه؟
باید وویل شي چې د نن ورځې دویمه لوبه د امو نهنګانو او بندامیر ښامارانو ترمنځ پیل شوې ده.