په غزې تړانګه کې روغتیایي چارواکي وایي، چې نن په غزې ښار کې پر یوه ښوونځي چې فلسطینیانو پهکې پناه اخیستې، د اسراییل په یوه هوايي برید کې له شپېتو زیات کسان وژل شوي دي.
په غزه کې د روغتیا وزارت د امبولانس او بېړنیو خدمتونو ادارو وویل، په دغه برید کې چې د غزې ښار په مرکزي برخه کې پر تابعین ښوونځي شوی، شاوخوا ۴۷ نور کسان ټپیان شوي دي.
د اسوشیتید پرس خبري اژانس د راپور لهمخې د اسراییل پوځ دغه برید تایید کړی، خو ادعا یې کړې چې په ښوونځي کې دننه د حماس د قوماندې مرکز یې په نښه کړی دی.
پوځ پهدې اړه شواهد نهدي وړاندې کړي.
دا په غزه کې د اسراییل او حماس ترمنځ لس میاشتنۍ جګړه کې یو له خونړیو بریدونو ګڼل کېږي.
د راپور لهمخې په غزې تړانګه کې نژدې ټول ښوونځي د هغو کسانو پر پناه ځایونو بدل شوي چې د جګړې له امله خپلو کورونو پرېښودو ته اړ شوي دي.
د ملګروملتونو د شمېرو لهمخې د جولای تر شپږمې نېټې پورې په غزه کې د ۵۶۴ ښوونځیو له ډلې پر ۴۷۷ یې یا مستقیم بریدونه شوي یا د جګړې له امله زیانمن شوې دي.
تر دې مخکې په جون میاشت کې د غزې په مرکزي برخه کې پر یوه ښوونځي چې فلسطیني کډوالو پهکې پناه اخیستې وه، د اسراییل په هوایي برید کې لږ تر لږه ۳۳ کسان وژل شوې و چې ۱۲ یې ښځې او ماشومان و.