په تبعید کې د افغان خبریالانو فدراسیون د طالبانو له حکومت څخه غواړي چې افغان خبریال ابراهیم محتاج سمدستي راخوشې کړي.
د دې فدراسیون مشر ضیابومیا بېګا ازادي راډیو ته وویل، د طالبانو سیمهيیز چارواکي که د خبریالانو په چارو کې ستونزې ویني، نو د رسنیزو سرغړونو د کمېسیون له لارې دې اړوند مسایل حل کړي.
په کندهار کې سرچینو بېګا ازادي راډیو ته وویل چې، د طالبانو استخباراتو پنځه ورځې مخکې د ملت غږ راډیو د خپرونو مسوول ابراهیم محتاج او نور کارکوونکي ونیول چې، نور وروسته خوشې شول خو محتاج تر اوسه هم د طالبانو په بند کې دی.
د طالبانو حکومت تر اوسه د محتاج د نیولو په اړه څه نهدي ویلي.
لهدې مخکې د افغانستان د خبریالانو مرکز د خپلو سرچینو په حواله ویلي و، ښاغلی محتاج د کندهار د امرباالمعروف او نهی عن المنکر ادارې نیولی دی.
محتاج په تېره یوه میاشت کې دوهم خبریال دی چې په کندهار کې نیول کېږي.