د پېښور عالي محکمې د یوه حکم په صادرولو پولیس او امنیتي ځواکونه د هغو افغان هنرمندانو له نیولو منع کړل چې د طالبانو له واک ته رسېدو وروسته پاکستان ته کډوال شوي دي.
د پېښور محکمې دا پرېکړه پرون د جون په شلمه، د کډوالو په نړیواله ورځ وکړه.
له محکمې څخه د تېر کال د اکټوبر په ۲۴مه نېټه ۱۴۷ افغان هنرمندانو غوښتي وو چې د دوی ځورول دې ودرول شي او پناه دې ورکړل شی.
د ملګرو ملتونو پراختیايي پروګرام پر اساس، د ۲۰۲۱م په اګست کې د طالبانو له بیا واک ته رسېدو وروسته یو میلیون او ۶۰۰زره افغانان ګاونډیو هېوادونو ته کډوال شوي دي.