د اسراییلو پوځ وايي چې اته سرتېري یې پرون شنبې د غزې په تړانګه کې په یوه چاودنه کې وژل شوي دي.
د پوځ ویاند دانیال هګاري تېره شپه ناوخته وویل، د دې سرتېرو زغرګاډی د یوه ایښودل شوي ماین یا د ټانک ضد توغندي په وسیله په نښه شوی دی.
د فرانسپرېس آژانس د راپور له مخې د تېر کال د اکټوبر له اوومې نېټې راهیسې په غزه کې د اسراییل د پوځ د تلفاتو شمېر تراوسه ۳۰۶ ته رسېدلی دی.
د غزې جګړه د اکټوبر په اوومه پر اسراییلو د حماس له برید وروسته پیل شوه.
په دې برید کې نژدې ۱۲۰۰ اسراییلیان ووژل شول او ۲۴۹ نور یرغمل شول.
متحدایالات او اروپايي ټولنه حماس د یوې تروریستي ډلې په توګه پېژني.