د ملي مقاومت په نوم د طالبانو ضد جبهې ادعا کړې چې کابل او هرات کې یې د طالبانو شپږ سرتېري وژلي او ټپیان کړي دي.
دغې جبهې په یوه خبرپاڼه کې ویلي چې غړو یې د کابل د اوومۍ ناحیې په واصل آباد سیمه کې تېره شپه د طالبانو پر یوې پوستې برید کړی چې دوه تنه یې وژلي او یو بل یې ټپی کړی دی.
د خبرپاڼې له مخې تېر ماخوستن د هرات په انجیل ولسوالۍ کې هم د دوی په ورته برید کې دوه طالب سرتېري وژل شوي او یو بل ټپی شوی دی.
طالبانو تراوسه په دې اړه څه نه دي ویلي.
ازادي راډيو په خپلواکه توګه د دې پېښې تایید نه شي کولای.