په غزه د اسراییلو د بریدونو له دوام سره هممهاله د ترکیې ولسمشر رجب طیب اردوغان پر فلسطینیانو غږ وکړ چې متحد شي.
د اېایفپي خبري اژانس د راپور له مخې اردوغان دا څرګندونې په استانبول کې د حماس د سخت دریځې ډلې له مشر اسماعیل هنیه سره له څو ساعتونو خبرو اترو وروسته وکړې.
اروپايي ټولنه او امريکا حماس يو تروريستي سازمان ګڼي.
د ترکیې د ولسمشرۍ له مطبوعاتي دفتره په خپره شوې خبرپاڼه کې راغلي چې اردوغان ویلي، اسراییلو ته سخت ځواب او د بریا لاره په یووالي پورې اړه لري.
د ترکیې ولسمشر د غزې په شخړه کې د منځګړي رول لوبولو په هڅه کې پاتې راغلی دی.
د هنیه او اردوغان تر منځ دا لیدنه په داسې حال کې کېږي چې د منځني ختیځ کړکېچ خپل اوج ته رسېدلی دی.
په دې وروستیو کې ایران پر اسراییلو برید وکړ او بیا اسراییلو ته منسوب ایران باندې د برید خبرونه ورکړل شول.
په عین حال کې په غزه کې د اسراییلو پوځي عملیات روان دي.