په ایران کې تېره شپه د چارواکو په خبره، څو " ترهګریزو بریدونو " کې لږ تر لږه پنځه پولیس افسران وژل شوي او لس نور ټپیان شوي دي.
رویټرز خبري اژانس د ایران د دولتي رسنیو په حواله نن پنجشنبه ویلي چې بریدګرو د سیستان- بلوچستان ولایت په رسک او چابهار ښارونو کې د سپاه پاسداران انقلاب ځواکونو پر مرکزونو برید کړی دی.
فرانس پریس خبري اژانس د سیستان بلوچستان د مرستیال والي علي رضا مرحمتي په حواله ویلي چې وژل شویو افسرانو کې د پولیسو د یوه مرکز مرستیال عباس میر هم شامل دی.
ایراني چارواکو ویلي، لږ تر لږه ۸ تنه بریدګر هم چې غوښتل یې د پولیسو مرکز ونیسي، په ځوابي ډزو کې وژل شوي دي.
فرانس پریس لیکلي چې جیش العدل جهادي ډلې د دغو بریدونو مسولیت منلی دی.
دا بریدونه دوه ورځې وروسته تر دې کیږي چې د ایران د سپاه پاسداران ۷ غړي د سوریې په مرکز دمشق کې د اسراییلو په هوایي برید کې ووژل شول.