درې با خبره سرچینو رویټرز ته ویلي چې ایران مسکو ته نژدې د کنسرت پر یوه سالون له خونړي برید مخکې روسیې ته د " ترهګریزو بریدونو " د احتمال خبر ورکړی و.
د کورکوس ښار د کنسرت پر تالار د مارچ د ۲۲مې نیټې په برید کې لږ تر لږه ۱۴۴ تنه ووژل شول.
د دغه ترهګریز برید چې تېرو شلو کلونو کې تر ټولو خونړی یاد شوی، مسولیت داعش وسله والې ډلې ومانه.
رویټرز د خپلو سرچینو په حواله ویلي، له دې حملې څو ورځې مخکې تهران د یوې لوې ترهګریزې احتمالي حملې اطلاعات روسیې سره شریک کړي وو.
د سرچینو په باور، ایراني چارواکو د مسکو د برید اطلاعات له هغو کسانو څخه د پوښتنو ګروېږنو پر مهال ترلاسه کړي چې ایران کې د وروستیو خونړیو بریدونو په تړاو نیول شوي دي.