په پروان کې د طالبانو چارواکي وايي، د هغو مسافرو د لېږد هڅه روانه ده چې د سالنګ تونل په دواړو برخو کې راګېر پاتې دي.
دغه لویه لار پرون ناوخته د سختو واورو او توفانونو له کبله د هر ډول موټرو پرمخ وتړل شوه.
هغو مسافرو چې د تونل په دواړو خواوو کې راګېر پاتې وو له ازادي راډیو سره په خبرو کې ویلي چې له جدي ستونزو سره مخامخ دي.
لا دهغو کسانو د برخلیک په باب معلومات نه شته چې د سالنګ په تونل کې دننه راګېر پاتې دي.
د پروان لپاره د طالبانو د امنیې قوماندانۍ ویاند فضل الرحمن مسکینیار ویلي، د سالنګ تونل په دواړو غاړو کې د راګېر پاتې شویو مسافرو د ژغورنې هڅې روانې دي.
دغه لار له څو اوونیو راهیسې څو وارې د سختو واورو او توفانونو له کبله د لنډو مودو لپاره تړل شوې ده.