پنټاګون وايي د امریکا دفاع وزیر لویډ اوسټین به نن له خپل اسراییلي سیال یوواف ګالانټ سره د غزې په جنوبي ښار رفح کې له ځمکنیو عملیاتو پرته د حماس ډلې د ماتولو پر لارو چارو خبرې وکړي.
حماس د امریکا او اروپايي ټولنې له خوا د یوې تروریستي ډلې په توګه پېژندل کېږي.
دا په داسې حال کې ده چې د دواړو هېوادونو په اړیکو کې ترینګلتیا په زیاتېدو ده.
اسراییلو وروسته له دې چې متحدو ایالتونو په غزه کې د بېړني اوربند په اړه د امنیت شورا پرېکړه لیک ته ممتنع رایه ورکړه د اعتراض په توګه ناڅاپه واشنګټن ته د یوه جګپوړي اسراییلي پلاوي سفر لغوه کړ، خو د پنټاګون مطبوعاتي سکرتر پاټ ریډر بیګا وویل چې اوسټین او ګالانت به د واشنګټن په وخت سهار سره وګوري.