د اوکراین د پلازمېنې کییف په مرکزي سیمه کې نن دوشنبه سهار د څو چاودنو غږ اورېدل شوی دی.
فرانس پرېس خبري اژانس په کییف کې د خپلو خبریالانو په حواله ویلي چې له چاودنو سره هممهاله د خطر زنګ وهل شوی او له خلکو غوښتل شوي چې خوندي ځایونو کې پاتې شي.
د کییف ښاروال ویتالي کلیچکو پر خپل ټیلګرام چېنل د چاودنو پیښې تایید کړي او له خلکو یې غوښتي چې ژر تر ژره خوندي ځایونو ته ولاړ شي.
د ازادۍ راډیو د خبر مرکزي څانګې د چارواکو په حواله لیکلي، په کییف کې د یوه توغندي ټوټي د هستوګنې په یوه ودانۍ لګېدلي او زیانمنه کړې یې ده.
تر دغو چاودنو څو ساعته مخکې روسیې د اوکراین پر جنوبي ښار میکلایف د بې پیلوټه الوتکو بریدونه وکړل چې لږ تر لږه ۱۱ تنه په کې ټپیان شول.