د خوړو نړیوال پروګرام وايي، دوی تېره میاشت په افغانستان کې له شپږو ملیونو وګړو کسانو سره د نقدو پیسو یا هم خوړو مرسته کړې چې خپل ماشومان ماړه کړي.
د دې ادارې د افغانستان څانګې پرون شنبه په خپله ایکس شبکه کې لیکلي چې دوی د ځینو خصوصي تمویلوونکو او د خپلو همکارو هېوادونو لکه: اسټرالیا، جاپان، روسیې او سویډن په مالي مرسته د دغو مرستو په برابرولو وتوانېدل.
د ملګرو ملتونو د بشري چارو د همغږۍ ادارې یا اوچا د معلوماتو له مخې، روان میلادي کال په افغانستان کې څه کم ۲۴ ملیونه وګړي بشري مرستو ته سخته اړتیا لري.
ګڼو مرستندویو ادارو ویلي چې د بودجې د کموالي له کبله نه شي کولی ټولو اړو کسانو ته بشري مرستې ورسوي.