په غزه کې د اسراییل او حماس ترمنځ پر روانې جګړې د پنځو میاشتو له تېریدو سره په سیمه کې بشري بحران لا پراخ شوی.
د ملګرو ملتونو د بشري مرستو د همغږۍ ادارې ویلي چې د غزې شمالي برخه سخته قحطي ګواښي.
د دې ادارې مسوول او ویاند رامیش راجا سیهنګام پرون چهارشنبې په جینواکې د غزې وضعیت ډیر د اندیښنې وړ وباله او ویې ویل:
" موږ د فبرورۍ میاشتې په وروستیو کې یو او لږترلږه ۵۶۷ زره کسان چې د غزې د نفوس یوه پرڅلورمه برخه ده، قحطۍ ته ورنژدې دي."
د خوړو نړیوال پروګرام یا ډبلیو ایف پي وایي، هیڅ مرستندویه ډله نه ده توانیدلې چې په تېره یوه میاشت کې د غزې شمالي برخې ته مرستې ورسوي.
یو شمېر اسراییلي ځواکونه په غزه کې
د دې پروګرام په وینا، اسراییل د غزې شمال ته د مرستو او هم دې سیمې ته د لاسرسي مخه نیولې ده.
په اوس وخت کې پرخوراکي موادو بار ډېر موټر درول شوي، خو د یو شمېر بهرنیو هېوادونو پوځونه د غزې جنوبي برخې ته له هوا مرستې غورځوي.
په عین حال کې په غزه کې د یوه لنډ مهاله اوربند لپاره نړیوال مرکچیان وایي چې د اسراییل او حماس ترمنځ د شپږو اوونیو لپاره یوه اوربند ته نژدې شوي دي.
د یوه اوربند لپاره هڅې له څو اونیو راهیسې د مصر، قطر او د امریکا د متحدو ایالتونو له خوا پیل شوي، خو تراوسه یې نتیجه نه ده ورکړې.
د ځینو هېوادونو او سازمانونو مرستندویه ډلې له هوا څخه خلکو ته د مرستو کڅوړې ور غورځوي
تمه ده چې د یوه لنډ مهاله اوربند په ټینګیدو سره به د اسراییل له زندانونو د سلګونو فلسطیني بندیانو د خوشې کېدو په بدل کې د حماس له خوا لسګونه برمته شوي آزاد شي.
حماس پراسراییل د اوکتوبر په اوومه له برید سره نژدې ۱۲۰۰ کسان ووژل او شاوخوا ۲۴۰ تنه یې یرغمل کړل.
د تېرکال په وروستیو کې د یوه لنډ مهاله اوربند په ترڅ کې حماس ۱۰۵ تنه یرغمل آزاد کړل او اسراییل هم په بدل کې له خپلو زندانونو ۲۴۰ فلسطیني بندیان خوشې کړل.