د افغانستان د رسنیو او خبریالانو یو شمېر ملاتړي بنسټونه نیوکه کوي چې د رسنیو په استازیتوب د دوحې غونډې ته څوک نه دي وربلل شوي.
د افغانستان د خپلواکو خبریالانو اتحادیې په دې تړاو په یوه اعلامیه کې ویلي چې د نړیوالې ټولنې له خوا د افغانستان دننه خبریالانو له پامه غورځول د توجیه وړ نه دي.
په اعلامیه کې راغلي چې د افغانستان په اړه په نړیوالو غونډو کې د رسنیو حضور مثبتې اغېزې لرلی شي.
د دوحې په ناسته کې شاوخوا پنځه فعالان له افغانستان دننه او بهر د افغان مدني ټولنې په استازولۍ ور غوښتل شوي.
د دوحې غونډه د ملګرو ملتونو په کوربه توب جوړه شوې او پکې له افغانستان سره د تعامل د زیاتولو پر څرنګوالي بحث کېږي.