د افغانستان پخواني ولسمشر حامد کرزي یو ځل بیا په افغانستان کې په بېلابېلو برخو په ځانګړي ډول د پوهنې په برخه کې د موثرو اقداماتو غوښتنه وکړه.
کرزي د سه شنبې په ورځ (د جنورۍ په ۳۰ مه) په ایکس شبکه (پخواني ټویټر) کې ویلي چې د پوهنې په برخه کې یې له یو شمېر فعالو ښځو سره کتلي او د افغانستان د ودې او پرمختګ لپاره یې د نجونو د تعلیم او لوړو زده کړو د اړتیا په اړه خبرې کړي.
حامد کرزي همداراز د افغان نجونو لپاره د ښوونځیو او پوهنتونونو بیا پرانستل د افغانستان د پرمختګ لپاره یوه حیاتي موضوع بللې ده.
د ۲۰۲۱ کال له اګسټ راهیسې، کله چې طالبانو په افغانستان کې واک تر لاسه کړ، افغان نجونې په منځنیو ښوونځیو او لېسو کې له زده کړو منع شوې دي او د ۲۰۲۲ کال په ډسمبر کې هم افغان ښځې او نجونې پوهنتونونو ته له تلو منع شوې.