ټاکل شوې ده چې د دوشنبې په ورځ په کابل کې د سیمه ییز تماس ډلې غونډه جوړه شي.
تمه ده چې په دې غونډه کې د افغانستان لپاره د روسیې، چین، ایران او پاکستان ځانګړي استازي برخه واخلي.
دا لومړی ځل دی چې د دوه زره یوویشتم کال د اګست له پنځلسمې راوروسته چې طالبانو کابل نیولی دی، هلته د سیمې د هېوادونو د استازیو غونډه جوړیږي.
د دې غونډې د اجنډا په اړه څه نه دې ویل شوي، خو له افغانستانه د امنیتي ګواښونو مخنیوی، بشري حقونه او په ځانګړې توګه د ښځو حقونو ته درناوي او د ټولشموله حکومت جوړیدل هغه غوښتنې دي چې د سیمې هېوادونه یې له طالبانو څخه کوي.