د طالبانو د حکومت د روغتیا سرپرست وزیر ډاکټر قلندرعباد هیله څرګندوي چې سږ۲۰۲۴ کال به د افغانستان لپاره د پولیو د ناروغۍ د ختمولو او کنټرول وروستی کال وي.
باخترخبري آژانس چې طالبان یې اداره کوي په یوه راپورکې وایي چې ښاغلي عباد دغه څرګندونې پرون چهارشنبې د پولیو د ناروغۍ د ارزونې او همغږۍ هغې کلنۍ غونډې ته وکړې چې د وزارت پر چارواکو سربېره د روغتیا د نړیوال سازمان استازیو او روغتیا پالانو پکې ګډون کړی و.
ښاغلي عباد وویل چې په وروستیو دوو کلونو کې په افغانستان کې د پولیو ناروغۍ یواځې ۸ مثبتې پېښې ثبت شوي چې دا د ده په خبره د پولیو یا ګوزڼ د ناروغۍ په کنټرول او مخنیوي کې یوه ستره لاسته راوړنه ده.
د عامې روغتیا سرپرست وزیر همدارنګه وویل چې وزارت یې د خپلو شریکانو په ملتیا په پام کې لري چې سږ ۲۰۲۴ کال په ټول افغانستان کې د پولیو واکسین څلور کمپاینونه ترسره کړي.