راپورونه وايي، تېره شپه د ننګرهار په حصارک ولسوالۍ کې د طالبانو د پوهنې د امر مولوي غلام جيلاني حنفي کور ته د نامعلومانو کسانو لاسي بمونه غورځولي او د هغه ۴ لورګانې یې وژلي دي.
د ننګرهار لپاره د طالبانو د پوهنې ریاست ویاند فرهاد احمد ستانکزي د ننګرهار د مطبوعاتي دفتر په واټس اپ ګروپ کې دغه پېښه تایید کړې ده.
د دې پېښې انګېزه معلومه نه ده او چا یې لا مسوولیت هم نه دی منلی.
تر دې مخکې هم د افغانستان په ځینو برخو کې د طالبانو حکومت پر چارواکو ډول ډول بریدونه شوي دي.
د ۲۰۲۳م کال په اګست میاشت کې د بلخ لپاره د طالبانو والي محمد داوود مزمل په خپل دفتر کې ووژل شو.
د هغې وژنې مسوولیت داعش ډلې منلی و.