د ایران د کورنیو چارو وزارت نن د کرمان د چاودنو په تړاو د یو شمېر مشکوکو کسانو د نیولو خبر ورکړ.
دا خبر په داسې وخت کې خپور شو چې ماتم کوونکو د جسدونو د خاورې ته سپارلو پر مهال پر تابوتونو اوښکې بهولې او د تلوېزیون له لارې په خپرو شویو ویډیوګانو کې ښکارېدل چې خلک د غچ اخیستو شعارونه ورکوي.
په کرمان کې د قدس ځواکونو د پخواني قوماندان قاسم سلېماني د تلین د مراسمو پر مهال د چهارشنبې په ورځ په غبرګو چاودنو کې نژدې سل تنه ووژل شول چې دا په ایران کې د اسلامي انقلاب له پيله تراوسه تر ټولو خونړۍ چاودنې دي.
سلېماني په ۲۰۲۰م کال د جنوري په درېیمه په عراق کې د امریکا د بې پيلوټه الوتکې په برید کې وژل شوی و.