ملګرو ملتونو د افغانستان لپاره د ځانګړي استازي د معرفي کولو وړاندیز کړی دی.
د ملګرو ملتونو امنیت شورا پرون په نیویارک کې د خپلې غوندې پرمهال دا وړاندیز وکړ او ویې ویل چې په دې ډول به له افغانستان او د افغانستان له اوسنیو واکمنو سره د نړیوالې ټولنې تماس زیات شي.
فرانس پریس اژانس راپور ورکوي چې د پرېکړې له مخې به دا ځانګړی استازی د جنسیتي برابري او بشري حقونو مسالې ته ډېره پاملرنه کوي.
د ملګرو ملتونو سرمنشي انتونیو ګوتیرش به اوس دا ځانګړی استازی ټاکي.
تر اوسه په دې اړه څه نه دي ویل شوي چې کله به دا استازی معرفي کیږي.