د افغانستان محلي رسنیو د کابل طبي پوهنتون د استاد ډاکتر عبدالغفار همدرد د وژل کېدو خبر ورکړی دی.
پژواک خبري اژانس په کابل کې د طالبانو د امنیه قومندانۍ د ویاند خالد ځدراڼ په حواله ویلي چې پېښه پرون ماذدیګر د کابل ښار په ۸ مه حوزه کې شوې ده.
په خبر کې راغلي چې دغه ډاکتر د خپلې معاینه خانې مخته د نامعلومه کسانو په ډزو کې وژل شوی دی.
تراوسه د پېښې انګېزه معلومه نه ده، خو پژواک د خالد ځدراڼ په حواله ویلي، هغه مشکوک کس نیول شوی چې د ډاکتر همدرد کورنۍ پرې د قتل ادعا لري.
په کابل کې تر دې وړاندې هم ډاکتران د ترور او تښتونې او نورو جنایي جرمونو قرباني شوي دي.