د سربیا پولیسو یو افغان تبعه د انسانانو د قاچاق په تور له وسلې سره یوځای نیولی.
د سربیا د کورنیو چارو وزارت پرون دا خبره رسنیو ته کړې ده.
له دغه افغان تبعه سره یو سنایپر ټوپک، دوه کلاشینکوفه او څه باندې پنځه نیم سوه مرمۍ هم د سبوتیکا سیمې په یوه ځنګله کې موندل شوي.
د سربیا پولیسو د شنبې په ورځ هم دوه افغانان د قاچاق په تور له وسلو سره یوځای نیولي وو.
د سربیا پولیسو مخکې خبرداری ورکړی وو چې له کرواسیا سره په پوله باندې اکثرې قاچاقبرې ډلې د افغانانو له خوا اداره کېږي.