په اسلام اباد کې د ترهګرۍ ضد محکمې د پښتون ژغورنې غورځنګ د مشر منظور پشتین ضمانت منظور کړ.
د دغې غورځنګ یو مخکښ غړي ادریس پشتین د ازادي راډیو مشال څانګې ته نن د ډسمبر ۲۶مه ویلي، د ترهګري ضد محکمې په دواړو قضیو کې د منظور پشتین ضمانت منلی دی.
د ادریس په خبره، دوی د اسنادو د لاسلیک لپاره د قاضي په تمه دي.
ښايي په دې ضمانت سره منظور پشتین له زندانه راخوشې شي.
منظور پشتین د ډسمبر پر څلورمه د بلوجستان د پولیسو له خوا په چمن کې هغه مهال ونیول شو چې د بلوڅانو په احتجاجي پرلت کې کډون کړی و.