چک جمهوریت په پلازمېنه پراګ کې د یوه ۲۴ کلن محصل د ډزو په نتیجه کې د ۱۴ کسانو د وژل کېدو له کبله سبا شنبه ملي ویر اعلان کړی دی.
د پنجشنبې ناوخته د پراګ په مرکزي برخه کې په چارلز پوهنتون کې د ډزو په نتیجه کې ۲۵ نور کسان ټپیان شوي چې د لسو وضعیت ناوړه بلل شوی دی.
د دې پېښې له کبله ګڼو هېوادونو او سازمانونو عکس العمل ښودلی دی.
د چک ولسمشر پیټر پاول ویلي د هغې پېښې له کبله یې ټکان خوړلی او د پېښې د قربانیانو له خپل خپلوانو سره یې خواخوږي ښودلې ده.
د جرمني، فرانسې، سلواکیا، اروپايي ټولنې او اسراییل مشرانو هم خواخوږي ښودلې ده.
سپینه ماڼۍ وايي چې چمتو ده د اړتیا په صورت کې د چک جمهوریت لاسنیوی وکړي.
د سپینې ماڼۍ ویاندې کرین ژایر پېیر ویلي، د فډرال ادارې چارواکي چې د چک جمهوریت له چارواکو سره د دې پېښې په اړه څېړنه کوي په تماس کې دي او د امریکا متحد ایالتونه د اړتیا په صورت کې مرسته کوي.
بل لوري ته د اوکراین ولسمشر ولودمیر زیلینسکي په خپله ایکس شبکه یا پخواني ټویټر کې لیکلي چې د پېښې د قربانیانو له خپلوانو سره خپله صمیمانه خواخوږي ښيي.
زیلینسکي ټپیانو ته د عاجلې شفا هیله کړې ده.