د اروپايي ټولنې یوه چارواکې وايي، د دې ټولنې ځینو غړو هېوادونو ژمنه کړې چې نږدې ۶۱زره کډوال په راروانو دوو کلونو کې ومني.
د اروپايي ټولنې د کورنیو چارو کمېشنرې یولوا یوهانسن دا خبره پرون پنجشنبه په جینیوا کې په یوه کنفرانس کې وکړه.
هغې ویلي، اروپايي ټولنې له ۲۰۱۵م کال راهیسې د قبولۍ د بشردوستانه پروګرامونو له لارې ۱۷۵زره کسانو ته پناه ورکړې ده.
هغې ویلي، اوس خوشحاله ده، چې د اروپايي ټولنې څوارلسو غړو هېوادونو ژمنه کړې چې په ۲۰۲۴ او ۲۰۲۵م کلونو کې به د بیامېشتولو او د بشري قبولۍ پروګرامونو له مخې نږدې ۶۱زره کسانو ته پناه ورکوي.
له دې شمېر به ۳۱زره کسان د کډوالو په چارو کې د ملګرو ملتونو د لویې کمېشنرۍ د پروګرامونو له لارې په اروپايي هېوادونو کې ځای پر ځای شي.