د پاکستان سترې محکمې د دې هېواد له حکومت څخه غوښتي دي چې د افغان کډوالو د اېستلو د بهیر د بندولو لپاره د فعالانو له خوا د شوې عریضې په اړه دې محکمې ته ځواب ووايي.
سترې محکمې په دې اړه د بشري حقونو د فعالانو د هغې عریضه په اړه د بحث لپاره پرون د ډسمبر په لومړۍ نېټه غونډه وکړه چې د حکومت دا پرېکړه یې په محکمه کې ننګولې ده.
دا فعالان وايي چې موقت حکومت د پاکستان د پالیسیو اړوند د دومره لویو پرېکړو صلاحیت نه لري.
د پاکستان سترې محکمې پرون ماښام اعلان وکړ چې حکومت باید په دې اړه خپل ځواب وړاندې کړي.
محکمې په دې اړه بحثونه راتلونکې اوونۍ ته وځنډول.
د پاکستان حکومت د اکتوبر په درېیمه نېټه اعلان وکړ چې په دې هېواد کې دېره ټول بې اسنادو افغانان باسي او دې کډوالو ته یې د وتلو لپاره د نوامبر لومړۍ نېټه وروستی مهلت وټاکه.
د طالبانو د حکومت د کډوالو او راستنېدونکو چارو وزارت ویاند عبدالمطلب حقاني پرون وویل چې تراوسه شاوخوا ۴۱۷ زره افغان کډوال خپل هېواد ته ستانه شوي دي.