د افغانستان د فوټبال ملي ټيم د نړیوال جام د مقدماتي سیالیو په لړ کې بېګا ۴ پر صفر له کوېټ ماتې وخوړه.
دا لوبه د سعودي عربستان دمام ښار کې وشوه.
دا د ۲۰۲۶ کال د فوټبال نړیوال جام د غوراوي سیالیو د مقدماتي دور پر مهال په شاوخوا لسو ورځو کې د افغانستان دویمه لویه ماته ده.
افغانستان تر دې مخکې د نومبر په شپاړسمه د قطر له فوټبال لوبډلې اته پر یو ماته ومنله.
د افغانستان د فوټبال لوبډله په دې وروستیو کې د ځینو لوبغاړو د لانجو په خاطر له ستونزو سره مخ ده او د پخواني کوېټي روزونکي تر ایستلو وروسته فوټبال فدراسیون انګریز سر روزونکی اشلي وسټ ووډ د ټیم د روزنې لپاره ټاکلی دی.
د افغانستان اکثر مخکښ او تکړه فوټبالرانو د فوټبال د فدراسیون په مشرتابه تور لګولی چې په مالي فساد کې ښکېل دي او په همدې خاطر نور ملي ټيم کې نه لوبیږي.
خو فوټبال فدراسیون دا تورونه رد کړي.