د افغانستان او پاکستان د سوداګرۍ او پانګونې د ګډې خونې یو چارواکی خان جان الکوزی وایي، د تورخم لاره بیرته د بار وړونکو موټرو پرمخ پرانیستل شوه.
نوموړي نن مخکې ازادي راډیو ته وویل چې دغه لاره له پاکستاني لوري سره د طالبانو د چارواکو د ترسره شویو خبرو په نتیجه کې بیرته پرانیستل شوې.
هغه زیاته کړه چې د دغې دروازې تړل کیدل په تورخم کې د کمیسارانو له صلاحیته پورته و او په دې اړه باید د طالبانو او د پاکستان چارواکي پریکړه وکړي.
له دې مخکې پاکستان ویلي وچې یوازې هغو افغان ټرک چلونکو ته اجازه ورکوي چې پرتورخم واوړي چې د افغانستان پاسپورټ او د پاکستان ویزه ولري.
د پاکستان د دې اقدام په وړاندې په تورخم کې سیمه ییزو چارواکو هم ورته اقدام کړی و.
د طالبانو لوړپوړو چارواکو تراوسه د باروړونکو موټرو پرمخ د دغې دروازې د پرانیستل کیدو په اړه څه ندي ویلي.