ملګرو ملتونو غزې ته د بشري مرستو د رسولو بهیر، د سونګ د موادو د کمښت او د مخابراتي شبکو د شنډېدو له کبله پرون وځنډاوه.
دا اقدام به د رویټرز خبري آژانس د راپور له مخې د زرګونه وږو او بې کوره فلسطینیانو وضعیت تر دې لا خراب کړي.
د خوړو نړیوال پروګرام وايي چې ملکي وګړي د غذایي موادو د کمښت له کبله سمدستي له احتمالي قحطۍ سره مخامخ دي.
په داسې حال کې چې د جګړې اوومه اوونۍ پیلېږي، د نړیوالو موسسو چارواکي وايي چې د غزې پر ۲،۳ میلیون وګړو د روان بحران یو نوی وېروونکی پړاو راروان دی. اسراییلو ژمنه کړې چې پر غزې واکمنه حماس ډله به له منځه وړي.
متحدایالات او اروپايي ټولنه حماس د یوې تروریستي ډلې په توګه پېژني.
اسراییلو وروسته له هغه په غزه کې پوځي عملیات پیل کړل چې دې ډلې د اکتوبر په ۷مه د اسراییلو پر خاوره برید وکړ، لږترلږه ۱۲۰۰ کسان یې ووژل او ۲۴۰ کسان یې برمته کړل.
د غزې روغتیايي چارواکي وايي، د اسراییلو په حملو کې له ۱۲ زرو زیات کسان چې پنځه زره ماشومان هم په کې دي وژل شوي دي.