د اوکراین د انرژۍ وزیر وايي، هېواد یې د انرژۍ کافي سرچینې لري، چې د راروان ژمي لپاره کفایت کوي.
جرمن ګالوشچینکو دغه څرګندونې پرون ناوخته داسې وخت کړي، چې اټکل کېږي د روسیې د حملو پراخوالی ښايي د انرژۍ د تامین شبکې ګډې وډې کړي.
ګالوشچینکو د اوکراین عامه ټلویزیون ته وویل، په دې برخه کې د انرژۍ کافي سرچینې لرو او د ارامۍ احساس کوو.
هغه ویلي اوس پوښتنه دا ده چې راروانې حملې څومره د انرژۍ د اکمال بهیر اغېزمنولی شي.
کییف تېره چهارشنبه وویل، په وروستیو اوونیو کې روسیې د اوکراین پر اساسي بنسټونو ۶۰ وارې حملې کړي دي.
دې مسئلې اندېښنې ولاړې کړي، چې مسکو له مخکې د ژمي پر مهال د اوکراین د برېښنا پر شبکې حملې پیل کړې دي.
د تېر ژمي پر مهال هم د روسیې په زرګونو بې پېلوټه الوتکو او میزاییلو د برېښنا بنسټونه په نښه کړي وو، چې د برېښنا د پرچاوۍ سبب شوې وه.