د پاکستان د بشري حقونو کمېسیون له پاکستانه د افغان کډوالو د ایستلو پر مهال د چارواکو پر ناوړه چلند انتقاد کړی دی.
دې کمېسیون نن پر خپله ایکسپاڼه لیکلي چې په پلازمېنه اسلام آباد او په سند، خیبرپښتونخوا او بلوچستان ایالتونو کې د چارواکو د ناوړه چلند په نتیجه کې اووه ماشومان له خپلو کورنیو جلا شوي او افغانستان ته استول شوي.
کمېسیون زیاتوي چې پاکستان د مدني ټولنو او د کډوالو د نړیوالو ټولنو له نیوکو سره سره خپلو دې اقداماتو ته چې له نړیوالو اصولو او قوانینو سرغړونه ده دوام ورکوي.
د پاکستان د بشري حقونو کمېسیون پر حکومت غږ کړی چې له افغانانو سره باعزته چلند وکړي او ماشومان په هېڅ صورت له خپلو کورنیو جلا نه کړي.