د طالبانو د ریاست الوزرا اقتصادي مرستیال ملا عبدالغني برادر تهران ته د خپل سفر پر مهال د ایران د بهرنیو چارو له وزیر حسین امیر عبداللهیان سره وکتل.
د ملا برادر دفتر په په خپله اېکس شبکه کې لیکلي، چې په دې کتنه کې په سیاسي، اقتصادي، تعلیمي، فرهنګي او نورو برخو کې پر ګډو همکاریو خبرې وشوې.
د طالبانو د ریاست الوزرا اقتصادي معاونیت ویلي، چې د طالبانو تر ولکې لاندې افغانستان غواړي چې د ایران له لارې خپل صادرات او واردات زیات کړي او په دې برخه کې یې له ایرانه د ملاتړ غوښتنه کړې ده.
ملا عبدالغني برادر د طالبانو د یوه هیئت په مشرۍ پرون شنبه تهران ته لاړ.
ایرنا خبري اژانس راپور ورکړی، چې دغه هیئت پرون په ضمن کې د ایران او افغانستان د ګډ اقتصادي کمیسیون په غونډه کې ګډون وکړ.
دغه اژانس لیکلي، د سوداګرۍ، ټرانزیت، انتقالاتو، ګمرک او چاپېریال په برخو کې د ګډو کاري ډلو ایجاد په دې غونډه کې د بحث عمده ټکي وو.
د طالبانو ریاست الوزرا د اقتصادي مرستیال ملا عبدالغني برادر په مشرۍ د طالبانو هیئت پرون شنبه تهران ته لاړ.
طالبانو ویلي، چې دغه سفر د ایران په رسمي بلنه شوی دی.
د ایران په ګډون د نړۍ یوه هېواد هم د طالبانو سرپرست حکومت په رسمیت نه دی پېژندلی، خو ایران له هغو هېوادونو دی، چې د طالبانو ډیپلوماتان یې منلي دي.