د کندهار د سوداګرۍ او صنایعو خونه وايي، له کندهاره سږکال د څه باندې ۱۵ میلیون ډالرو په ارزښت انګور بهر ته صادر شوي دي.
د کندهار د سوداګرۍ خونې مرستیال عبدالباقي بینا بېګا ازادي راډیو ته وویل چې د کندهار انګور پر نورو هېوادونو سربېره کورنۍ بازار هم لري.
هغه زیاته کړه:
" تقریبا ۲۸۶۰۰ ټنه انګور راجسټر شوي او صادر شوي دي او په کور دننه هم د کندهار انګور تر ډېرو ځایونو پورې ځي. خو چې صادر شوي دي ۲۸۶۰۰ ټنه دي چې پنځلس میلیونه یوسل او اته پنځوس زره امریکايي ډالر ارزښت لري."
انګور او انار د کندهار د باغونو مهم محصولات دي چې هرکال افغانستان ته د میلیونونو ډالرو عواید راوړي.