د اسراییل پوځ نن ویلي، د دوی جنګي جټ الوتکو د غزې په شمال کې تر ځمکې لاندې ۱۵۰ اهداف ویشتلي دي.
دا حملې داسې وخت شوي، چې درې اوونۍ مخکې پر اسراییل د دغه هېواد په تاریخ کې تر ټولو خونړۍ حمله شوې وه.
د اسراییل د پوځ په خبره په ویشتل شویو ساحو کې تروریستي سمڅې، تر ځمکې لاندې جنګي ساحې او اضافي زېربناوې شاملې دي.
د پوځ په وینا د دوی په حملو کې د حماس ډلې ګڼ «تروریستان» هم وژل شوي دي.
په غزې تړانګه او د اسرائیل په جنوب کې خبریالان وايي، چې نن هم راکټي او هوايي حملې دوام لري.
د اسراییل پوځ ویلي، په یوه حمله کې یې د حماس ډلې د هوايي حملو مشر عاصم ابو رکاب هم وژل شوی، چې پر اسراییل یې د اکتوبر د اوومې نېټې په حمله کې کلیدي رول درلود.
بلخوا په غزه کې مخابراتي خدمات بند شوي او له محاصره شويو خلکو سره ټلیفوني اړیکې پرې شوې دي.