د ملګرو ملتونو د بشري چارو د همغږۍ اداره اوچا وایي، اسټرالیا د هرات زلزله ځپلو ته د یو میلیون استرالیایي ډالرو نوره مرسته برابروي.
دغې ادارې پرون پر خپله ایکس شبکې د استرالیا له دغې مرستې هرکلی کړی دی.
اوچا وړاندې ویلي، اسټرالیا له ۲۰۱۴ کال راهیسې د افغانستان د بشرپالنې له صندوق سره ۷۰ میلیونه اسټرالیایي ډالره مرسته کړې ده.
هرات په دې وروستیو کې د څو زلزلو شاهد و چې د ملګرو ملتونو د شمېرو له مخې شاوخوا ۱۵ سوه کسان په کې مړه او دوه زره نور ټپيان شول.
اوچا وایي، دغو زلزلو په څو ولسوالیو کې څه باندې ۶۶ زره کسان متاثره کړي دي.