د اکتوبر پنځمه د ښوونکي/معلم له نړیوالې ورځې سره برابره ده.
په افغانستان کې ګڼو ښوونکو په تېره بیا ښځینه وو معلمینو د طالبانو په بیا واکمنېدو سره خپلې دندې له لاسه ورکړي دي او له اقتصادي ستونزو کړېږي.
د طالبانو حکومت د ښوونکي د ورځې په مناسبت په کابل کې یوه غونډه هم نیولې ده.
دې غونډې ته د طالبانو د حکومت د رییس الوزرا اداري مرستیال عبدالسلام حنفي وویل که امکانات تر لاسه کړي نو له ټولو مخکې به د ښوونکو امتیازات پورته کړي.