د یونان د ژغورنې ډلې څلور غړي چې لیبیا ته د مرستې لپاره تللي وو، پرون یکشنبه په ترافیکي پېښه کې مړه شوي دي.
د لیبیا په ختیځ کې د حاکم حکومت روغتیا وزیر عثمان عبدالجلیل ویلي، دغه کسان هغه وخت مړه شول، چې موټر یې له بنغازي څخه سېلاب ځپلې سیمې درنا ته روان و.
د هغه په وینا، په دې مرستندویه ډله کې څه باندې ۱۹ کسان شامل وو چې ۴ یې مړه شول او ۱۵ نور ټپیان شول.
په درنا کې د سپټمبر پر لسمه تر سختو اورښتونو وروسته سېلابونه وبهېدل چې تر اوسه یې د ملګرو ملتونو په وینا تر ۱۱زرو ډېر کسان مړه کړي دي.
په لیبیا کې چې په تېلو غني دی، له ۲۰۱۴م کال راهیسې د سیالو حکومتونو ترمنځ کړکېچ روان دی.
یو یې د دغه هېواد پر ختیځ او بل یې د پلازمېنې طرابلس په ګډون د لیبیا پر لوېدیځ واکمن دی.