د هندي رسنیو د راپورونو له مخې د دې هېواد حکومت له ژمنې سره سم افغانستان ته پنځوس زره ټنه غنم او ځینې نورې اړینې مرستې رسولي دي.
هند د ملګرو ملتونو د بشري حقونو د شورا په ۵۴مه غونډه کې چې پرون په جینوا کې پرانیستل شوه، په یوه اعلامیه کې وویل چې پر غنمو سربېره یې د دوه سوه ټنه واکسینونو او نورو روغتیایي وسایلو او د طبعي پېښو له زیانمن شویو سره ۲۸ ټنه مرسته کړې ده.
په اعلامیه کې همدارنګه ویل شوي چې هند د افغانستان وضعیت له نږدې څاري او د خپلو مرستو په بدل کې یوازې غواړي چې دا هېواد له سولې او ثبات څخه برخمن شي.
هند چې د افغانستان د ړنګ شوي حکومت یو نږدې شریک ګڼل کېده، افغانستان ته یې د خپلو مرستو بهیر په ۲۰۲۲ کال کې پیل کړ.
هند افغانستان ته د غنمو او نورو مرستو د بشپړولو خبره داسې مهال کوي چې د خوړو نړیوال پروګرام ویلي چې د افغانستان نږدې دېرش میلیون وګړي بېړنیو بشري مرستو ته اړتیا لري.